女性朋友今年三十二歲，結識咗細自己三年嘅對象，問我有咩意見。
記得細個嘅時候，我好希望將來嘅另一半年紀係大過我，最好大我五年，如果同年同月同日嘅就算遲一分鐘都唔可以。總覺得大過自己嘅男人比較穩重，除咗可以帶我認識更多姿多彩嘅生活之外，仲可以照顧我給我安全感。大個之後先發現條數並唔係咁計！首先，喺2019年嘅女性，都係自己照顧自己😂。又假設你而家已經三十二，大你五年都三十七歲啦...應該都有一大半成咗家立咗室😂。而且最重要嘅係，自己嘅生命應該由自己去圓滿，唔應該期待別人去保護你或者幫你成長。
曾經交往過比自己大七年嘅男朋友，亦曾經同一個細過自己五年嘅男孩曖昧過，雙雙都劃上句號。然後當你再談多幾次戀愛，讓時間累積經歷，你就更會發現，唔係年紀大嘅對象就代表比較懂愛情，年紀細嘅對象就代表會更疼更愛你；背叛你嘅人，無論咩年紀都會拋棄你；貪新忘舊嘅人，無論咩年紀都會離開你。年齡對於戀愛並唔係有最直接關係，反而跟自己先係最有關係。
「點解我呢幾段感情都咁唔順利？」
一般人都普遍想去改變世界、管理別人，但好少記得最需要改變同管理嘅其實係自己。無論咩年紀都好，學懂管理自己係一門學問，尤其係面對寂寞。面對寂寞嘅恐懼並唔係呢個情緒嘅本身，反而多數係害怕面對赤裸嘅自己。你喜歡嘅對象，無論係咩年紀咩身份，一個月搵幾多錢都好，呢啲都係社會給予嘅labelling。兩個人嘅相處就係要撕掉所有嘅label唔需要任何掩飾，就算比對方見到你嘅不足一面，大家都仍然能夠真切相待互不離棄，愛情嘅火花先會開始擦出。如果你連真正嘅自己都害怕面對，那又如何坦誠與對方相處呢？
當然，有一啲基本嘅外在條件大家係要自己衡量啦...即係你好難同個未成年嘅人一齊又同我講話係真愛，又或者你好想要小朋友但係已經臨近四十，同時又愛上咗個鮮肉大學生，唔好咁浮誇可以嗎？🙃
對於愛情，年紀唔係最緊要，條件亦只係錦上添花。
其實，兩個人開心就已經足夠了。
共勉之
#最完美的年齡差距就是沒有
#兩個人開心就足夠了
#女人像鹽
Search